„განათლებული ადამიანი იმდენად ნატურალურია, მას გული თვალებში უციმციმებს“

by admin | Январь 19, 2018 21:55

*მზე რომელიც ღამე ამოდის *

“იასონ, შენც გემახსოვრება ჩემი პაპა, ცხონებული ნიკოლოზი… იმ კაცმა «სტუმარ მასპინძელი» ზეპირად არ იცოდა, მაგრამ მისი ოჯახიდან გულდაწყვეტილი სტუმარი არ გასულა …

პაპამ არც ფსალმუნები იცოდა ზეპირად, მაგრამ იცოდა რომ მასში ცხოვრობდა ღმერთი, რომელიც უყვარდა…
პაპა არც მათემატიკაში იყო გენიოსი, მაგრამ იცოდა მთელი სიზუსტით გამრავლება, გაყოფა და განაწილება სიკეთისა…
პაპამ არც ვეფხისტყაოსნის აფორიზმები იცოდა ზეპირად, მაგრამ ის საოცრად ჰგავდა ამ პოემის ყველა დადებით პერსონაჟს…
პაპამ არც კოდექსები იცოდა ზეპირად, მაგრამ მტყუან-მართალის გარჩევა არასოდეს გასჭირვებია…
პაპამ არც ჰიპოკრატეს ფიცი იცოდა, მაგრამ ყველა ავადმყოფს მალამოდ ედებოდა…
შეიძლება უამრავი რამ წაიკითხო, დაიზეპირო, მაგრამ განსწავლულობა არც შენს აღზრდაზე მეტყველებს და არც განათლებაზე. მთავარი ის არ არის, რამდენი რამის დაზეპირებას მოასწრებ… მთავარია გაგაჩნდეს შინაგანი კულტურა და იცოდე, ის რაც უკვე ისწავლე. რისთვის,
ვისთვის, როგორ და რაში უნდა გამოიყენო…
— დიდი ხანია ვაკვირდები განათლებულ ადამიანებს ოტია და ერთი რამ აღმოვაჩინე. განათლებული ადამიანი იმდენად ნატურალურია, გული თვალებში უციმციმებს…
მათ გააჩნიათ მინიმალური თვით-მოთხოვნილებები და მაქსიმალური ვალდებულებები. განათლებულ ადამიანებს არ ახასიათებს საწყისი ცხოველური ინსტიქტები…
განათლებული ადამიანი ვერასდროს განიცდის პირად კეთილდღეობას და ბედნიერებას, თუ მის ქალაქში, სოფელში, ქუჩაში, ხელგამოწვდილი მოხუცი, ან ბავშვი მათხოვრობს. მათ ამ დროს ამაყად თავაწეული სიარულის რცხვენიათ……
განათლებული ადამიანი უგუნური კაცის სისულელეზე იღიმება, მაგრამ მას არასოდეს დასცინის……
მათ არ უყვართ კამათი სულელებთან, რადგან იციან, ეს ერთადერთი შემთხვევაა, როდესაც თავხედს და უტიფარს გამარჯვების გვირგვინს ადგამენ……
განათლებული ადამიანი იმდენად ნატურალურია, მას გული თვალებში უციმციმებს.“

ნუგზარ (სულა) სულაშვილი

ნანახია:(5709)-ჯერ


Comments

comments

Source URL: http://www.jolo.ge/ganatlebuli-adamiani-imdenad-naturaluria-mas-guli-tvalebshi-ucimcimebs/