ბედნიერების საიდუმლო | Jolo.ge


ბედნიერების საიდუმლო

ბედნიერების საიდუმლო

ერთმა ვაჭარმა ბედნიერების საიდუმლოს გასაგებად შვილი ყველაზე დიდ ბრძენთან გააგზავნა. ყმაწვილი ორმოცი დღე უდაბნოში მიდიოდა. ბოლოს როგორც იქნა, მთის წვერზე მდგარ მშვენიერ სასახლეს მიადგა. ბრძენთაბრძენი სწორედ ამ სასახლეში ცხოვრობდა.

შიგნით რომ შევიდა, ყმაწვილი დარბაზში აღმოჩნდა, სადაც ცხოვრება დუღდა და გადადუღდა: ვაჭრები შედიოდნენ და გადიოდნენ, კუთხეში ვიღაცები იდგნენ და ლაპარაკობდნენ, ორკესტრი ტკბილ ჰანგებს უკრავდა, მაგიდაზე კი ყველაზე გემრიელი კერძებით დამშვენებული სუფრა გაეწყოთ. ბრძენი ხან ვის ესაუბრებოდა, ხან ვის, ამიტომ ყმაწვილი დიდხანს ელოდა მასთან შეხვედრას.

მისი რიგი რომ მოვიდა, ბრძენმა მას ყურადღებით მოუსმინა, მაგრამ ახლა შენთვის ბედნიერების საიდუმლოს გასამხელად დრო არა მაქვს, წადი, სასახლეში ისეირნე და ორი საათის შემდეგ მოდიო, უთხრა.
— ერთი თხოვნაც უნდა შემისრულო, — დასძინა მან, ყმაწვილს მომცრო კოვზი გაუწოდა, ზედ კი ორი წვეთი ზეთი დააწვეთა, — სეირნობისას ეს კოვზი ისე გეჭიროს, რომ ზეთი არ დაიღვაროს.

ყმაწვილი სასახლის კიბეებზე ადიოდა და ჩადიოდა, თან კოვზს თვალს არ აშორებდა. ორი საათის შემდეგ ბრძენთან დაბრუნდა.

— როგორ ისეირნე? — ჰკითხა მან, — ჩემი სასადილო ოთახის სპარსული ხალიჩები თუ ნახე? იმ ბაღში თუ იყავი, რომელსაც მთავარი მებაღე ათი წელი ქმნიდა? ჩემი ბიბლიოთეკის მშვენიერი პერგამენტები თუ დაათვალიერე?

შემცბარი ყმაწვილი ბრძენს გამოუტყდა, რომ არაფერი ენახა, რადგან მთელი ყურადღება კოვზისკენ და ორი წვეთი ზეთისკენ ჰქონდა მიპყრობილი.

— კარგი. წადი და ახლა მაინც გაეცანი ჩემი სამყაროს საოცრებებს, — უთხრა ბრძენმა, — არ შეიძლება ენდო იმას, ვისი სახლის შესახებაც არაფერი იცი.

გულდამშვიდებულმა ყმაწვილმა კოვზი აიღო და ისევ სასახლეში სეირნობას შეუდგა. ამჯერად ის სასახლის ყველა საოცრებას, კედლებზე გამოფენილ ხელოვნების ყველა ნიმუშს ყურადღებით აკვირდებოდა. მოინახულა მთებით გარშემორტყმული ულამაზესი ბაღები, იხილა უნაზესი ყვავილები და შეიგრძნო ხელოვნების ნიმუშებით სასახლის მომრთველის გემოვნების სინატეიფე და მიხვდა, რომ ყველაფერი საჭირო ადგილზე იყო. უკან დაბრუნებულმა ნანახი დაწვრილებით აღუწერა ბრძენს.

— ის ორი წვეთი ზეთი სადაა, მე რომ ჩაგაბარე? — ჰკითხა ბრძენმა.

ყმაწვილმა კოვზს დახედა და ნახა, რომ მთელი ზეთი დაღვრილიყო.

— ამ ერთადერთი რჩევის მოცემა შემიძლია, — უთხრა ბრძენმა, — ბედნიერების საიდუმლო იმაშია, რომ წუთისოფლის ყველა საოცრებას ამჩნევდე და შენი ორი წვეთი ზეთიც არასოდეს დაივიწყო.

 

წყარო: http://absolutelyfreelevan.blogspot.com/

ნანახია:(1090)-ჯერ


Comments

comments



Related Articles

ამ ვიდეოს ნახვის შემდეგ რწმუნდები, რომ არ არსებობს — „არ შემიძლია“

სამ წუთიანი ვიდეორგოლი „ჩვენ სუპერ ადამიანები ვართ“ Channel 4 — მა გადაიღო. კლიპის მთავარი გმირები პარაოლიმპიურ თამაშებში (2016) მონაწილეები გახლავთ. „დიახ, მე


სასარგებლო რჩევები მეტი თავდაჯერებულობისთვის

თავდაჯერებულობა ის ატრიბუტია, რომელსაც ყველა ადამიანი ისურვებდა, მაგრამ უმრავლესობამ არ იცის როგორ მიაღწიოს მას. თუ თქვენ ხართ თავდაჯერებული, მაშინ სხვებიც


„უნდა შეეგუოთ, რომ ადამიანების დიდი ნაწილი დაუნახავია“…

დაიმახსოვრეთ, იცოდეთ, უნდა შეეგუოთ, რომ ადამიანების დიდი ნაწილი დაუნახავია.  ვერ ხედავს სიკეთეს, კეთილგანწყობას, განა იმიტომ, რომ არ უნდა დაინახოს, ვერ


No comments

Write a comment
No Comments Yet! You can be first to comment this post!

Write a Comment

<